…Брахма бурхан болон Шива бурхан зэргийг маш хялбархнаар баярлуулж болохын зэрэгцээ маш хялбархан уурлуулж болно. Тэд баясан сэтгэл ханах аваас бодож эргэцүүлэх зүйлгүйгээр адислалаа хайрладаг ба хэрэв уурлах юм бол мөн л бодож төдөх зүйлгүйгээр өөрийн бхакта буюу мөргөн бишрэгчээ харааж орхидог. Харин Бурхан Кришна буюу Вишну нь тэднээс эрс ялгаатай. Бишрэлтэн нь Бурхан Вишнугаас ямар нэг зүйлийг хүсвэл Вишну Бурхан эхлээд энэ адислал нь тухайн бхактад тохирох уу үгүй юу гэдгийг цэгнэж үздэг. Бурхан Вишну хэзээ ч өөрийн бишрэлтэнд эцсийн дүндээ сөрөг нөлөө учруулах адис өршөөлийг өгдөггүй. Тэр энэ нь Түүний бишрэлтэнд ашиг тустай юу гэдгийг эхлээд заавал тунгаадаг.

… Шива бурхан гэх мэт сахиулсан тэнгэрүүдийн хайрладаг адис өршөөлийн тухайд аугаа мэргэд дараахь түүхийг иш татан өгүүлжээ. Нэг удаа Шива бурхан Шакунийн хүү Врикасура нэрт чөтгөрт адислал өгөөд дараа нь өөрийгөө аюултай хүнд байдалд аваачсан түүх юм. Врикасура нэгэн адислал хүсч, энэ адислалыг хүртэхийн тулд гол гурван бурханы чухам хэнд нь хандахаа шийдэж ядаж байжээ. Ингэж явтал түүнтэй аугаа мэргэн Нарада учран таарах аз тохиож. Тэрээр шуудхан л өөрийн сайн дураар үйлдэх хатуу чанга тэвчил хатамжлалын үр дүнд хурдан хүрэхийн тулд хэнд хандвал зохихыг асуув. Нарада ч тэрхүү асурын дотоод санааг ойлгож мэдсэн тул түүнд: “Чи юу юунаас илүүтэй Шива бурханд мөргөх нь зүйтэй. Тэгэх аваас чи маш хурдан хүссэндээ хүрэх болно” хэмээн хариулж. Түүнчлэн Нарада түүнд, Равана болон Банасура нэрт асурууд Шива бурханд зүгээр л залбирал мөргөл өргөөд асар их эд баялгийн эзэн болсон тухай жишээ ч татаж гэнэ. Их мэргэн Нарада, Врикасура чөтгөрийн мөн чанарыг тодорхой мэдэж байсан тул Вишну эсвэл Брахмад хандахыг зөвлөөгүй аж.

Нарадын зөвлөгөөг сонсоод Врикасура Кедаранатха нэрт мөргөлийн газар тийш шуудхан явсан. Кедаранатха нь одоог хүртэл Кашмираас холгүйхэн оршин байдаг мөргөлийн газар билээ. Тэр газар бараг цаг ямагт цасанд дарагдсан байдаг. Судар шастирт бурханд хоол хүнсийг өргөхдөө галаар дамжуулж өргөх хэрэгтэй гэж онцгойлон зөвлөдөг. Ийм ч учраас Врикасура Кедарантха тийш очоод, тахилга өргөлийн гал түлж, Шива бурханыг баясган, тааллыг нь хангахыг хүссэн.

Шива бурханы адислалыг хүртэхийн тулд тэрээр гал ноцоож, Шива бурханыг баясгахын тулд өөрийн биенээс огтлон авч, өөрийн биенээс огтлон авсан тэрхүү махныхаа хэсгийг өргөл болгон түүнд өргөх болов. Энэ бол мунхгийн гунад үйлдэгдэж буй мөргөлийн жишээ юм. Бхагавад-гитад тахилга өргөлийн олон хэлбэрүүдийн тухай өгүүлсэн байдаг. Зарим нь буяны гунад, зарим нь шуналын гунад, зарим нь мунхгийн гунад.

Хэдийгээр Врикасура өөрийн тахилга өргөлөө зургаан өдрийн турш тасралтгүй үйлдсэн авч түүнд түүний мөргөл өргөлийн зорилго болсон Шива бурханыг мэлмийдэн харах аз тохиосонгүй. Тэр өөрөө түүнийг харж, түүнээс адислалыг нь биечлэн гуйхыг хүссэн. Үүгээрээ мөн асурууд болон бишрэлтэнгүүд ялгардаг. Бхакта буюу бишрэлтэн хүн итгэл бишрэлтэйгээр ямар ч зүйлийг өргөвөл Бурхан түүнийг нь хүлээн авна гэдэгт итгэлтэй байдаг бол асурууд нь түүнээс шулуухан адис өршөөл гуйхын тулд өргөл өргөж буй бурхан шүтээнээ шуудхан нүдээр үзэхийг хүсэж байдаг. Долоо дахь өдрөө тэвчээр алдсан Врикасура, одоо Шивагийн тааллыг хангахын тулд толгойгоо түүнд өргөх хэрэгтэй юм байна гэсэн дүгнэлтэд хүрэв. Ингээд тэр тэндээс холгүйхэн орших нэгэн нууранд угаал үйлдээд бие болон үсээ арчилгүйгээр толгойгоо огтлохоор бэлдэв. Асурыг толгойгоо огтлохоор бэлдэх яг тэрхэн үед  Шива бурханд түүнийг энэрч өршөөх сэтгэл төржээ.

Ингээд Шива тэрхүү чөтгөрийг өөрийгөө хорооход нь саад хийхээр тахилгын галаас гарч ирэв. Шива бурхан түүнд дөнгөж гар хүрээд түүнийг үхлээс аварсан байна. Мөн түүний шарх нь ч тэрхэн даруйд анин эдгэж, урьд нь ямар байсан яг тэр төрхөндөө оржээ. Ингээд дараа нь Шива асурт хандаж хэлсэн нь: “Эрхэм Врикасура минь ээ, чи чухам яах гэж өөрийн толгойг огтлох гэж байгаа билээ. Надаас ямар л адис өршөөл хүснэ би түүнийг чинь биелүүлэх болно. Намайг баярлуулахын тулд яах гэж өөрийн толгойг огтлох гэж байсныг чинь би мэдэхгүй. Надад жаахан ус өргөсөн бол би сэтгэл ханах байсан даа”  гэжээ.

Шива бурхан ийнхүү тэр асурт ийм боломжийг олготол хариуд нь тэр нь аймшигтай, ой гутам адислалыг гуйв. Түүний хүсэлт нь гэвэл: тэр хэн нэгний толгойд дөнгөж хүрмэгц тэр нь хэн байлаа ч гэсэн толгой нь зад үсэрч үхэх тийм адислал байлаа. .. Шива бурхан түүний хүссэн ямар ч хүсэлтийг биелүүлнэ гэж амласан өөрийн амлалтандаа туйлын их харамсав. Тэр өөрийн амлалтаа зөрчихийг хүсээгүй ч  сэтгэл дотроо тийм адислал өгөх болсондоо маш их гэмшжээ.

Тэгмэгц аугаа нүгэлтэн болсон мөнөөхь асур тэрхүү адислалыг нь Шиваг өөрийг нь хороож, эхнэр Гауриг нь өөрийн болгож авах зорилгын тулд тэр дор нь ашиглахаар шийдэв. Ингээд тэрээр гараа Шивагийн тэргүүнд хүргэхээр дайрч гэнэ. Ингэж Шива бурхан өөрөө өөрийнхөө өгсөн адислалааасаа болж амь дүйсэн аюултай тулгарав. Шива туйлын их айсан тул амиа аврахын тулд газраар тэнгэрээр хаа сайгүй зугатав. Брахма, Индра, Чандра гэх мэт хүчирхэг сахиулсан тэнгэрүүд ч түүнийг хэрхэн аврахаа мэдэхгүй сандралдацгааж байлаа.

Ингээд эцэст нь Шива энэ материаллаг ертөнцийн чанадад байх Вайкунтхийн  гариг болох Шветадвипад хүрчээ. Тэнд Вишну буюу Бурханы Дээд Бодгаль Нараяна суудаг билээ. Тэрээр Шиваг маш том аюулд учирсныг хараад тэрхэн даруйд брахмачари дүрд хувиран түүнийг тосон очив… Тэгээд түүнийг тайвшруулахын тулд брахмачри түүнд хэлэв:

“Эрхэм Врикасура, чи чухам юуны тулд нааш ирэх болсноо Надад хэлвэл би магадгүй чамд туслаж болох юм шүү. Тэгээд чи хялбархнаар зорилгодоо хүрч болох юм”  хэмээв.

Брахмачари дүрд хувирсан Нараяна Бурханы үг чөтгөрийг тун ч ихээр тайвшруулсан бөгөөд эцсийн эцэст тэрээр түүнд өөрийн бүх түүхийг ярьж өгчээ. Үүнийг сонсоод Нараяан түүнд хэлэв: “Шива бурхан чамд тийм адислал өгсөн гэдэгт Би огт итгэхгүй байна. Миний л мэдэхээр Шива бурхан эрүүл ухаантай биш амьтан.. тэр чинь ад тотгор, хий үзэгдлүүдийн эзэн нь. Ийм ч учраас Би түүний үгэнд итгэхгүй. Гэхдээ чи Шива бурхан үнэн хэлсэн гэж бодоод байгаа бол чөтгөрүүдийн хаан минь ээ, яагаад чи түүний үгийг өөр дээрээ шалгаж, өөрийнхөө толгойд хүрч болохгүй гэж? Хэрэв тэр адислал гээч юм нь үйлчлэхгүй бол чи тэрхэн даруйд энэхүү худалч, хуурамч Шиваг хороож чадна гэсэн үг. Тэгээд тэр дахин хэзээ ч тэгж тиймэрхүү хоосон хуурмаг адислал өгч чадахгүй болно” гэв.

Нараяна Бурханы эелдэг зөөлөн үг, Түүний хуурмаг эрчим асурын толгойг мангууруулан эргүүлсэн тул тэрээр Шива бурханы агуу хүчин чадлыг ор тас мартсан байлаа. Тэгээд бодож төдөх ч зүйлгүйгээр гараа толгой руугаа явуулав. Асур толгойдоо дөнгөж хүрмэгц түүний толгой аянганд ниргүүлсэн мэт хага үсэрсэн бөгөөд тэр ч тэрхэн даруйд үхэж гэнэ. Сахиулсан тэнгэрүүд тэнгэрийн орноос Нараяна Бурханыг магтан алдаршуулж цэцгийн хур оруулав.

Ингэж Бурханы бодгаль Нараянагийн ач ивээлээр Шива бурхан асурын учруулж байсан үхэх аюулаас аврагдав. Энэ түүхийг итгэл, бишрэлтэйгээр уншсан хэн бүхэн материаллаг уяа хүлээснээс ангижрах бөгөөд түүнчлэн өөрийн дайснуудын нөлөөллөөс ангижрах болно.

“Мөнхийн цэнгэл жаргалын үндэс” номоос орчуулж бэлдсэн: Балабхадра дас

Бясалгалын төлөвт оршингоо хилерүүд хуруугаа дөнгөж хүний биед хүргээд биед нь гараа нэвт шургуулан хүний дотор сав эрхтэнд нэвтрэн орж, түүнээс өвчилсөн эрхтнийг гарган авах эсвэл ургасан хавдар зэргийг таслан авдаг аж. Зарим үед өвчтөний арьсан дээр цус шүүрч мэдэгдэх авч хилерийг мэс заслаа дуусган гараа авах үед өвчтөний бие дээр ямар ч шарх, гэмтлийн ул мөр огт үлддэггүй байна. Бүр өчүүхэн төдий ч сорви үлддэггүй. Энэ үед хамгийн сонирхолтой нь эмчлүүлэгч мэс засал хийж буй газарт ямар нэг хачин жигтэй ухалт, төнхөлтийг мэдрэхээс өөрөөр өвдөлтийг бараг л мэдэрдэггүй аж.  Харин энэ бол чухам үнэндээ мэс засал биш эмчлэгчийн бурханлаг эрч хүчтэй харьцан ажиллаж чадах чадвар юм. Хилерийн астраль биеийн алганы төв хэсэг ба хуруунуудын дунд хэсгээс цацран гарах энерги нь физик биеийн дотоодод нэвтрэн орж, өвдөж гэмтсэн хэсгийг зайлуулдаг байна. Сүүлийн үеийн германы эрдэмтдийн судалснаар энэ энерги эрчим хүч нь радиодолгионоос илүү цаашаа нэвтрэх чадвартай аж.

Энэ асуудлыг усан дээр шинжиж үзье л дээ. Жишээ нь та ус руу гараа дүрээд буцаагаад гаргахад тэнд гар хийсний ул мөр огт үлддэггүй шүү дээ. Тийм биз? Астраль биед мэс засал хийж байхдаа хилер нь бидний мэддэгээс огт өөр хэмжээс орон зайд ордог ба бие махбодио ухамсрын өөр орон зайд аваачих нь өөрөө тийм ч сенсац болгохоор гайхалтай зүйл биш ба үүнийг одоо хир нь буддын лам нар, энэтхэгийн йогчид, африкийн тайлгачид ч хийж чаддаг тул хилерүүд энэ салбарт анхдагчид биш юм.

Энэтхэг орон бол манай гариг дэлхийн хамгийн нууцлаг оньсого мэт зүйлсийн жагсаалтыг манлайлах орон гэдгийг бид зоригтой хэлж чадна. Одоо би та бүхэнд нэгэн ийм хилерийн тухай өгүүлэх болно. Тэрээр Раджастаны Удайапур хотоос холгүй амьдардаг ба дорно дахины үлгэрийн ид шидтэнүүдтэй эгээ адилхан нэгэн билээ.

РАДЖАСТАНЫ ХИЛЕР

Раджастанд хүрэлцэн очиж доктор Калифа- ба -Шайкхула Ислам Алхадж Мулана Малика нараар эмчлүүлсэн иргэн Андрей Головины Ведүүд сэтгүүлд зориулан тусгайлан ярьсан ярилцлагыг толилуулж байна.

– Намайг эртнээс л элэгний өвчин маань зовоож байгаа билээ. Миний нэг танил Вриндаваны Анджана дас гэр бүлтэйгээ Раджастаны нэр алдарт хилерт очих гэж байгааг сонсоод би ч бас хувь заяагаа туршиж үзэхээр шийдсэн юм. Олон хүмүүсийн яриснаар бол тэр чулууг болон өвчтэй эрхтнээс хэсэгчлэн тасдан авч дотор эрхтнүүдийг эмчилдэг аж.

Энэ ярианд би үг дуугүй итгэж байсан гэж хэлж чадахгүй. Тэр ч байтугай ийм төлийн эмчилгээнд ихээхэн эргэлзэнгүй хандаж байснаа хэлэх хэрэгтэй.

Энэтхэгийн хүн пиг дүүрэн галт тэргэнд суун, халуунд халан явсаар ядарч туйлдсан бид арай гэж эмчийн гэрт хүрэв. Энд ирээд хамгийн түрүүнд анхаарал татсан зүйл юу байсан гэвэл энд маш олон хүн хуран цугларсанд байлаа. Хилерт үзүүлэхээр ирсэн хүмүүсийн цутгалан хэзээ ч тасрахааргүй юм шиг санагдаж билээ. Энд энгийн эгэл жирийн тосгоны орршин суугчаас аваад орчин үеийн чамин ганган машин хөлөглөсөн чинээлэг энэтхэгчүүд ч ирсэн байх нь харагдаж байв.

Урьд өмнө нь бидэнд хэлсэнчлэн эмчлэгч маань эмчилгээний хөлс болгож ямар нэг тодорхой төлбөр тогтоогоогүй байсан. Түүн дээр ирж байсан хүмүүс өөрийн чадах хэмжээний мөнгийг тавиур дээр өөрсдөө тавьж байхыг бид харсан билээ. Тавиур дээр хамгийн өчүүхэн жаахан мөнгөнөөс аваад маш их хэмжээний мөнгө ч харагдаж байсан юм. Гэвч хилерийн хувьд энэ асуудал онцгой анхаарал татахгүй байх шиг байсан ба тэр ч байтугай тэрээр тэр тавиур руу харах ч үгүй байв.

Яагаад ч юм надад хилерийн хувьд энэ нь түүний үндсэн орлого биш юм шиг санагдсан. Ханан дээр нь хилертэй уулзаж байгаа янз бүрийн зургуудыг өлгөсөн байсан ба харваас эдгээр хүмүүс нь нилээд нэр алдартай хүмүүс бөгөөд мөн ямар нэг диплом гэх мэт зүйлсийг гардуулж буй ёслол ч юмуу гэмээр харагдаж байлаа.

Урьд өмнө нь би Энэтхэгт хэрвээ эмчлэгч эсвэл зурхайч ямар нэг үйлчилгээ үзүүлээд түүнийхөө төлөө ямар нэг тогтсон тариф, үнэ тогтоовол тэрээр шууд л өөрийн нэр төр, мэргэшилээ алддаг гэдгийг сонсож байсан. Мөн чанарынхаа хувьд тэд ямар ч хариу хүлээлгүйгээр хүмүүст туслах ёстой аж. Энд энэ хууль ёстой л номоороо хэрэгжиж байх шиг харагдаж билээ.

Ингэж ингэж арайхийж миний ээлж боллоо. Би дотогш оров. Хилер дорно дахины эртний үлгэрийн илбэчин, ид шидтэн шиг байхыг хараад би их гайхав. Уртаас урт сахал, дорнын хийцийн малгай, хамар дээрээ зүүсэн нүдний шил, нэвт шувт ширтсэн тайван ухаалаг харц гээд л. Миний урьд өмнөх оношийг мэдэхгүй байсан боловч тэрээр маш хурднаар түүнийг оношилоод, намайг шүтээн тийшээ аваачин, түүнд гараа хүргэхийг хүсэв. Ямар нэг залбирал уншаад тэрээр маш хурднаар хүйтэн хутганы ар талаар миний гэдсэн дээгүүр гүйлгэснээ дараа нь түүнийгээ хойш нь тавиад тэр газарт гараараа ямар нэг ухан төнхөх үйлдэл хийж эхлэв. Би түгшин сандрахаас өөр юу ч мэдрэхгүй зогссоор байлаа. Гэнэт хилер гараа миний гэдэснээс авч надад нарийхан тунгалаг хальс шиг юм харууллаа. Би ч мэл гайхаж, цэл хөхөрч орхив. Тэр хэлэхдээ түүнийг миний гэдэснээс гаргаж ирсэн гэлээ. Би ямар нэг цус энэ тэр гарах гэж бодож байсан боловч тэр гарсангүй. Тэр хальс бараг л хув хуурай байв. Мэдээжийн хэрэг миний гэдсэн дээр ямар ч ул мөр үлдээгүй юм. Одоо болтол би тэр үед юу болсныг бодоод бодоод олдоггүй юм.

Жинхэнэ эмчилгээ юу эсвэл зүгээр л сайтар бодож боловсруулсан үзүүлбэр үү? Гэвч үүнээс хойш миний эрүүл мэнд бодитойгоор сайжирч байгааг мэдэрч эхэлсэн. Огцом биш л дээ, аажмаар, мэдэгдэхүйцээр. Харин цаашаа юу болохыг цаг хугацаа л харуулах байх даа.

Өнөөг хүртэл бидний очсон энэ хүн түүн рүү зорин ирсэн тэр олон хүнийг мэхэлж мөнгийг нь авахын тулд ийм үйл хийж байсан гэж төсөөлж чадахгүй байна. Юуны тулд тэр үүнийг хийнэ вэ? Түүний ажлын утга учир мөнгөнд бус байсныг бид харсан шүү дээ. Мөн түүнчлэн хүндэтгэвэл зохих насыг харгалзан үзсэн ч тэрээр үүнийг нэр алдрын төлөө л лавтай хийгээгүй.

“Ведүүд” сэтгүүлээс товчлон орчуулж сийрүүлсэн:

Балабхадра дас /Б.Болдсүх/

Тун удахгүй би энэ асуултуудынхаа хариултыг олно гэж найдаж байлаа.

Миний асаргаанд байдаг өвчтөн эмэгтэй Дорис маш хялбархнаар гүн транст орж, өөрийн амьдралын үүх түүхтэй нүүр нүүрээрээ тулгарсан билээ. Би түүнээс тэр чухам одоо өөрийгөө хэн байгааг мэдэрч, харж байна вэ хэмээн асуухад тэр баяртайгаар: “Би их гоё сайхан хилэн хар морь байна” хэмээн хариулсан юм. Тэр надад морины биед оршин байгаа амьдралынхаа талаар ярьж эхэлсэн билээ. Би ч үүний зэрэгцээ: “Тийм, тийм, энэ чинь л надад хэрэгтэй байлаа шүү дээ” хэмээн бодов. Энэ түүх үнэхээр гайхалтай түүх байсан юм шүү! Гэвч хэрэв би түүнийг, түүний яг урьдны амьдрал тийш нь илгээвэл тэр адгуус амьтан байх байжээ. Өөрөөр хэлбэл амьдралын доод хэлбэрт. Эндээс сүнс нь аажмаар дахин дахин хувьсан төрсөөр эцэст нь амьдралын дээд хэлбэрт буюу хүний төрөлд ирдэг аж. Одоо харин би түүнийг энэ төрөлд төрөхөөсөө өмнө байсан тэрхүү адгуусны бие буюу хар морины биеэс өмнөх төрөлд буцан очихыг хүссэн билээ.Тэр цагт бид түүнийг өмнө нь амьдралын дэвшилтэт төрөлд байж уу аль эсвэл доод төрөлд байж уу гэдгийг нь ялган таньж болно. Магадгүй мориноос илүү бүдүүн хадуун адгуусны төрөлд төрж байсан байж болох шүү дээ. Регрессийн шатаар уруудан бид магадгүй тэрээр ямар нэг бүдүүлэг амьдралын хэлбэрт төрж байсныг нь мэдэж болох юм. Энэ нь өгсөн дээшилдэг хөгжил дэвшлийн баталгаа болох билээ.

Би түүнийг морь байхаас нь өмнөх үеийн төрөл тийш илгээв. Намайг туйлын ихээр гайхашруулсан зүйл нь юу гэвээс тэрээр түүний өмнө төрөлдөө нэгэн жаахан охин байсан агаад Сомарсетийн ферм дээр үйлдвэржилтийн хувьсгалын үед амьдарч байжээ. Тэрээр их аялгатайгаар, мөн барууны оршин суугчдын янзаар бүх зүйлийг уран дүрслэлтэйгээр ярьж өгсөн юм. Гайхамшигтай!

Тэрээр фермийн аж ахуйгууд хоосорч, эзэд нь Амласан тэр газар нутаг буюу тэдэнд амлаж байсан хотынх нь гудамжууд алтаар бүрхэгдсэн тийм газарт өөд шилжин нүүж байсан тэр үеийнхээ тухай ярилаа. Гэвч очсон тэр газарт нь тэднийг жинхэнэ тамын амьдрал хүлээж байжээ. Тэнд очоод тэрээр нэгэн ойворгон эмэгтэйн  үйлчлэгч болсон байна. Тэр түүнийг туйлын ихээр үзэн яддаг байж. Тэнд тэр урт удаан, аймшигтай 60 жилийг үдэн өнгөрөөсөн бөгөөд туйлын их ганцаардал шаналал дунд дээвэр дээр нас нөгчжээ. Ийнхүү барууны нэгэн эмэгтэй Викторигийн үеийн Лондон хотод нас нөгчөөд дараа нь тэрхүү хилэн хар морь болон төржээ. Яаж ийм байж болох вэ? Яаж гэдэг нь “Бхагавад-гитад” агуулагдаж буй билээ.

Би өөрийн үнэт эрдэнэ болсон тэр эмэгтэй өвчтнөө тэрхүү хаягдмал, ганцаардмал, ажиллаж байсан байшингийнхаа дээд давхарт туйлын ганцаардмал байдлаар нас нөгчих тэр үед нь аваачсан.

-Тэгэхээр та өөрийн үхэлдээ бэлдэж байв уу? Тэр үед таны бодож байсан зүйлийн талаар мэдэхийг би маш их хүсэж байна. Таныг өөрийн эрхэлж байсан ажлаа маш ихээр үзэн яддаг байсныг би мэднэ. Та тун ч их сэтгэл санаагаар унаж, дарамтанд байсан байх даа?

-Үгүй шүү, огтхон ч тийм биш, – хэмээн тэрээр гайхсан янзаар хариу өчлөө. –Би тийм мэт шоронгоос суллагдаж байгаадаа харин ч аз жаргалтай байсан юм. Би тэр үед өөрийн төрсөн, амьдрал минь эхэлсэн  тэр тосгоноо бодож байлаа. Бас тэрхүү гайхамшигтай хилэн хар морины талаар бодож байлаа. .. гэв.

Би бүр мэгдэж гүйцэв. Миний нотолгоо энэ дээ. Ийм юм гэж байж болох уу? Гүн ухааны хийгээд бурханлаг чиглэлийн нэг ч ном уншаагүй дунд зэргийн ухаантай ийм эмэгтэй Ведүүдийн батлан айлдаж байдаг  шиг ийм мэдлэгийг над өгч чадлаа гэж үү?

Эртний судар бичгүүдэд бидний дурлан татагдал биднийг энэ материйн ертөнцөд дахин дахин буцаан төрүүлдэг гэж олонтоо сургасан байдаг. Жишээ нь Махараджа Бхарата эхээсээ хаягдсан хөөрхий янзаганд санаа тавьж байснаасаа болж зээр гөрөөсний хэвлийд төрөх болсон түүх  бий. ..

Тоо томшгүй олон маргаан мэтгэлцээн энэ сэдвээр үргэлжилж болох л юм. Догшин хэрцгий Бурхан биднийг хүсээгүй биемахбодид төрүүлж шийтгэж байгаа хэрэг биш гэдгийг би мэднээ. Зөвхөн бидний ухамсар л аз жаргалыг, эрх чөлөөг, тусгаар байдлыг, ханамж таашаалыг эрэх аянд мордуулдаг  ажээ. Өнөөдрийн бидний хүлээн авсан энэ биемахбодь болвоос урьдны амьдралын маань ухаан ухамсраар бүтээгдсэн билээ.

Морины биемахбодь нь нас нөгчисний дараа тэр эмэгтэй дахин хүний биеийг хүлээн авсан ажээ.

Яг үүнтэй адил түүх Шримад-Бхагаватамд бий. Түүнийг Махараджа Бхарата гэдэг байсан ба тэрээр нэг амьдралын туршид адгуус амьтны төрөл тийш унасан агаад эцэст нь тэр амьдралынхаа төгсгөлд дахин хүний биеийг олж авдаг. Өөрийгөө таньж гэгээрсэн аугаа сүнс байсны хувьд Махараджа Бхарата өөрийн урьд төрлийг дурсан санаж чадаж байсан юм. Тэр чухам яагаад буга болоод төрчихвөө гэдгийхнээ учир шалтгааныг ч мэдэж байсан. Дахин хүний биеийг олж авсныхаа дараа тэрээр өөрийн бурханлаг хөгжил дэвшилд туйлын няхуур хандаж байсан ба энэ ертөнцийн элдэв хэрэгцээгүй зүйлс хийгээд уягдал татагдал зэргээс холхон байхыг хичээж байсан юм. Ингээд насны эцэст тэрээр амьдралын дээд төгс төгөлдөрт хүрч бурханлаг ертөнц тийш буцаж чадсан байдаг.

Жон Ричардсон “Үхнэ гэж хэзээ ч бүү хэл” номоос

орчуулж бэлтгэсэн: Балабхадра дас